No108. 锡庆里往事 第二章 烟囱管

我出生于80年代，从记事起，就好奇洋房里个点滴事物。我经常问我母亲问题，而伊也自幼生活于此。从听到个一眼零碎个信息里，我纔了解到庄家个部分故事。庄锡庆本人，我並未见过。 我一直弗欢喜洋房个暗洞：从房子东面进来，过道狭窄，终年弗见太阳，漆黑阴冷，日里向走走也抖抖豁豁。 我问母亲：“上海人住房紧张，条件侪弗理想，我懂个。但为啥阿拉小区个暗洞要箇恁设计？” 伊答道：“箇幢房子一开始並弗是公房，而是一个五金厂老板个花園洋房。 “老板个名字叫庄锡庆。阿拉103号弄堂大门口有两个字，虽然畀人家用水泥存心涂过，但还是看得见印子：‘锡庆里，1922年建’，就是庄锡庆个名字。庄锡庆住进来埃歇，洋房弗比孙中山故居逊色，一等一个豪华。 “现在103号弄堂大门口个位置，本来是铁门，靠了旁边石头围墙，门一关，就是庄锡庆私人财产。按伊设想，洋房入口垃南面。大理石个臺阶，宽得来可容三个人平排走。拱形个大门，两边柱头，高头遮阳棚。拱门进来个胡梯，直通二楼客堂间，就是现在万伯伯屋里。 “之所以有得暗洞，是因为房子经历了两次历史事件。锡庆里垃原法租界内，以唐家湾为界，同时代还有英美等国个公共租界。1941年，太平洋战争爆发，东洋人拿法英美等国个人赶脱，一时上海滩盗贼横行。庄锡庆为保平安，拿洋房南面个门封脱，胡梯拆脱。东面开出入口，存心修成暗洞，让外人弗容易进得来。暗洞尽头，搭出临时木头胡梯，通二楼西面后厢房。日军投降以后，庄锡庆放之炮仗，拿南面个正门再修成替原先一样。伊是完美主义者，拿暗洞到底个临时胡梯拆脱了。 “到了五几年碰着公私合营，庄锡庆为躲避仇家，再拿南面个拱门胡梯拆脱，重新启用暗洞，再造临时胡梯。箇趟伊财力吃紧，所以造了介搭浆。” 我问：“庄锡庆屋里介好，一定是大老板咯？伊是哪恁个人阿？” 母亲说：“我也没看见过伊，只认得伊两个囡兒。 “我小辰光跟了侬外公、外婆搬进箇幢房子。除脱阿拉，还有张阿姨跟大张姐姐、小张姐姐。张阿姨自家住垃马桶间隔壁朝东个小间，让大张姐姐睏垃前头西面箇间，小张姐姐睏垃东面最南间。其他房间侪已经畀空关锁脱了，包括一楼替三层楼所有个房间。 “妈妈小辰光替小张姐姐白相了最好。伊拉屋里有隻风琴，我经常去弹。伊书架高头侪是乐谱，里向头还夹了几张黑胶唱片，不过留声机坏脱放弗出声音。偶尔看到伊翻乐谱辰光，眼神有点异样，弗像小学生应该有个。 “张阿姨垃吉安路个厂里上班，后首来厂改成了小学，就是侬读个小学，原先埃面是法藏讲寺。张阿姨为之多赚两钿，畀张家两个姐姐吃牛肉，工作卖力，替领导要求做夜班。日里向，伊还要买小菜、汏衣裳、生煤炉、烧饭。 “我从来就没看见过张阿姨拉先生，就问外公究竟。伊讲：‘张阿姨没结过婚，老早是庄锡庆个佣人，比女主人小十多岁。庄锡庆是资本家，前两年去香港做生意了，两个小姑娘实际浪姓庄，是伊个囡兒。不过记牢：侬垃外头人面前千万只好叫伊拉张姐姐，否则要闯祸。’” 我问：“葛末庄锡庆两个囡兒我也没看到过呀。或者是囡兒个后代又改姓了，所以我弗认得？” 母亲讲：“弗是。两个囡兒后首来侪出过事体。 小张姐姐没读初中，毕业以后就替社会接触了。伊欢喜带人到张阿姨替大小张姐姐屋里参观。有段辰光，伊专门带同一个哥哥转来，迭个哥哥比大张姐姐还大几岁。张阿姨好像弗大欢喜迭个哥哥，背后头讲伊是小流氓。之后，小张姐姐从夜到老晏转来，发展到夜不归宿，有一日出去之后就再无音讯，直到张阿姨过世！” 我问：“伊畀小流氓拐脱了？” 母亲答：“‘小流氓’弗一定哪恁流氓。但我猜想，小流氓乱轧坏淘，朋友个朋友个朋朋友里向有得拐子大流氓，就发生了悲剧。 “事体过脱第二年，大张姐姐五爱中学（原惠中学塾，后改为五爱中学，再后头改为李惠利中学，再再后头改为比乐中学）毕业。为了支援国家建设，去黑龙江接受贫下中农再教育了。走个箇日，12月份，张阿姨替大张姐姐早浪四点钟就出门了。张阿姨衣着单薄，拿厚衣裳侪畀了伊，还为伊烧了十斤熟牛肉，让伊带之路高头吃。大张姐姐大包小包又背又拎，怪张阿姨畀伊物事忒多没必要，张阿姨弗停个关照啥个物事阿里隻包里寻。” 我问：“所以现在‘大张姐姐’屋里住个陈家，‘小张姐姐’屋里个孙家，侪是伊拉跑脱以后搬进来个？” 母亲讲：“弗是。小张姐姐个房间原本是主人房，顶大。现在孙家屋里是拿伊房间一揦两个一半，另外一半是郑家。但是大张姐姐跑脱以后，最先搬进来个还弗是陈家，而是冯家，之后调畀陈家。同样道理，小张姐姐个房间一揦两以后，一半畀了赵家，之后调畀钱家、孙家；另外一半周家、吴家，最后到郑家。” 我问：“再后头，阿拉个邻舍就陆续搬进来了？” 母亲讲：“对。几年后，底楼、三层楼侪畀住满，直到花園里也搭满棚棚，大家地方侪紧张。 “张阿姨隔壁个劳家，劳括币拉爸爸垃张家阿姨门口替伊自家门口当中，用砖头砌了灶头，劳括币拉爸爸一烧饭，就乌烟瘴气，张阿姨只好门一关，一家头迓进去弗敢响。” 我讲：“我晓得个，‘大张姐姐’就是去插队落户了，二舅舅二阿姨侪去过。好像一般性侪好回来个对伐？” 母亲答：“弗是。从理论高头讲，是转弗来个。二舅舅是要读大学；二阿姨声称要照顾外婆：伊拉纔回得来。70年代末，为防止社会混乱，一般知青有大小原因借口个，侪准许回原籍。但是，有一种情况是批弗准个，就是已经当地结婚个说话——除非离脱。 “大张姐姐一去就是十几年，垃当地结了婚，外加养了一对龙凤胎。但伊还是一家头回上海了，讲因为有严重个胃病。” 明显，“大张姐姐”为了回来离婚了。 母亲继续讲：“但可悲个是，伊转来后，原来姐妹两家头个房间侪已住进陌生人。大张姐姐垃张阿姨屋里住了一年多，寻了居委替弗晓得多少干部，侪没结果，最后只好再去黑龙江谋生了。” 我问：“三层楼烟囱像煞吃过炮弹，哪恁会个？讲起来淞沪会战打到阿拉屋里来过？” 母亲讲：“淞沪会战地方遠了，替阿拉浑身弗搭界。讲起箇桩事体，罪过了。 “小大张姐姐跑脱之后，伊拉两间房间就侪畀政府锁脱空关了。刚没人竳个几年，五爱中学个学生子——大张姐姐个学弟学妹——夜到没事体就叫之‘消灭资本家余孽，斩草除根！’个口号，用花園里个石头厾玻璃窗。小张姐姐个窗门畀弄得侪是洞，落雨刮风，房间里就水漫金山，拿地浪向个木头泡烂脱，水一直从缝缝里漏到一楼。 “张阿姨去寻有关部门，讲要去修，一直没人睬伊。伊讲只要替伊拿锁开出来，伊可以自家出铜钿修。人家干部对伊讲：‘侬十几年来，一直是拿白卡借住垃锡庆里个。房子又弗是侬个，侬管卵个闲事？’张阿姨反複解释因为两位张姐姐一定会得转来个，伊求人家讲：‘我倪东家留下来两个囡兒。大囡兒去黑龙江劳动，小囡兒跟伊个朋友出去白相。伊拉虽然还没转来，但再多等两年，总归会得转来个。房子坏得迭恁，我要修好之等伊拉转来继续竳。’人家听得莫名其妙。 “再后头，一天半夜，暴雨忽闪。小张姐姐房间个壁炉畀雨水灌满，湿透个烟囱管，赛过避雷针。一声巨响，屋头顶也赛过要穿脱，一米多宽砖头砌个烟囱，应声一断两。妈妈畀吓醒，吵得睏弗着，爬起来去马桶间，就听见张阿姨一家头垃房间里哭！”

You can listen to No108. 锡庆里往事 第二章 烟囱管 online on Radio and Podcast. Open the player on this page to stream the available audio.

No108. 锡庆里往事 第二章 烟囱管 is an episode from 闲话上海滩 by 闲话上海滩.

This episode is 14:38 long.

This episode was published on Sep 26, 2020.

Yes. Use the heart button on the episode page to add it to your favorite episodes list.

Yes. This page shows related episodes from 闲话上海滩 when more episodes are available from the podcast feed.